አንድ የውጭ ሀገር ዜግነት ያለው እና ምርጫውን ለመታዘብ ወደ ኢትዮጵያ የመጣ ግለሰብ በራዲሰን ሆቴል ዛሬ እንደተገደለ የተገለፀው መረጃ እውነታ

አንድ የውጭ ሀገር ዜግነት ያለው እና ምርጫውን ለመታዘብ ወደ ኢትዮጵያ የመጣ ግለሰብ በራዲሰን ሆቴል ዛሬ እንደተገደለ “አሉላ ሰለሞን” የተባለ ግለሰብ በትዊተር ገፁ ፅፏል። በርካቶችም ይህን መረጃ እንድናጣራ ጥያቄ አቅርበውልናል። 

ኢትዮጵያ ቼክ ከሆቴሉ ሰራተኞች፣ ግለሰቡን ከሚያውቁ ግለሰቦች እንዲሁም ከአዲስ አበባ ፖሊስ ኮሚሽን መረጃ አጣርቷል። 

ማምሻውን የደረሰን የተረጋገጠ መረጃ እንደሚያመለክተው ምርጫውን ለመታዘብ በ Carter Center በኩል ወደ ኢትዮጵያ የመጣ አንድ አፍሪካ-አሜሪካዊ በሆቴል ክፍሉ ውስጥ ህይወቱ አልፎ ተገኝቷል። ግለሰቡ እንደተገደለ የወጣው መረጃ “ፍፁም ያልተረጋገጠ” እንደሆነና ከህመም ጋር የተያያዘ ሊሆን እንደሚችል የደረሱን መረጃዎች ይጠቁማሉ። 

ከአዲስ አበባ ፖሊስ ኮሚሽን የደረሰን መረጃ ደግሞ ጉዳዩ እንደደረሳቸው ነገር ግን ዝርዝር መረጃ ነገ ይፋ እንደሚደረግ አሳውቀውናል።

Update 

በውጭ አገር ታዛቢው የአሟሟት ሁኔታ ላይ ምርምራ እየተደረገ መሆኑን የአዲስ አበባ ፖሊስ ኮሚሽን አስታወቀ!

የኮሚሽኑ የሕዝብ ግንኙነት ዳይሬክተር ኮማንደር ፋሲካ ፋንታ “ትናንት በራዲሰን ብሉ ሆቴል አሜሪካዊ ዜጋ በመኝታ ክፍሉ ሕይወቱ አልፎ ተገኝቷል” ብለዋል። የሆቴሉ የጽዳት ሠራተኛ ትናንት ጠዋት አንድ ሠዓት ገደማ አሜሪካዊው ያረፈበትን የመኝታ ክፍል ለማጽዳት ስትገባ ያየችውን ነገር ለፖሊስ ጥቆማ መስጠቷን ገልጸዋል። 

ኢትዮጵያ ቼክ በዚህ ዙርያ ቀደምት የሆነ መረጃ አጋርቶ ነበር። 

ፖሊስ መረጃውን እንዳገኘ ወደ ስፍራው መንቀሳቀሱንና አሜሪካዊው ከአልጋው ላይ ወደ መሬት ወድቆ ሕይወቱ አልፎ እንደተገኘ አመልክተዋል። በሟች ኪስ ውስጥ የኢትዮጵያ ብሔራዊ ምርጫ ቦርድ ልዩ የምርጫ ታዛቢ ወረቀት (ባጅ)፣ የተለያዩ መታወቂያዎችና መንጃ ፈቃድ መገኘታቸውን ተናግረዋል።

መንጃ ፈቃዱ “በአሜሪካ ካሊፎርኒያ ብሔራዊ የድራይቪንግ ላይሰንስ” የሚል እንደሆነም አስረድተዋል። በተጨማሪም አሜሪካዊው የሚጠቀምባቸው “በርካታ” መድሃኒቶችን ፖሊስ ማግኘቱንና “ምናልባት ሁኔታው ሲታይ በተፈጥሮ የሞተ እንደሚመስልና ነገር ግን ትክክለኛው መረጃ ከአስከሬን ምርመራ ውጤት በኋላ የሚታወቅ ነው” ብለዋል ዳይሬክተሩ።

“በአሜሪካዊው ዜጋ ሰውነት ላይ ምንም አይነት የአካል ጉዳትና ቁስለት አልተገኘም” ነው ያሉት ኮማንደር ፋሲካ።

የአዲስ አበባ ፖሊስ ኮሚሽን ከፌዴራል ፖሊስ ኮሚሽንና በአዲስ አበባ ከሚገኘው የአሜሪካ ኤምባሲ ጋር በመሆን በአሜሪካዊው ዜጋ አሟሟት ላይ ምርምራ እያደረጉ እንደሆነም ገልጸዋል። ፖሊስ አጠቃላይ የምርመራውን ውጤት በቀጣይ ይፋ እንደሚያደርግም አክለዋል።

የካርተር ሴንተር ፕሮግራም በኢትዮጵያ በይፋዊ የትዊተር ገጹ ዛሬ ማለዳ ባወጣው መረጃ በራዲሰን ብሉ ሆቴል ሕይወቱ ያለፈው የተቋሙ የአዲስ አበባ የፕሮግራም ስራ አስኪያጅ ዶክተር ጆን ማርሽ መሆኑንና ሕይወቱም ትናንት እንዳለፈ ገልጿል።

“የካርተር ሴንተር በኢትዮጵያ በጆን ማርሽ ድንገተኛ ሞት ከፍተኛ ሐዘን ተሰምቶናል፤ ጆን ማርሽ የኢትዮጵያ እውነተኛ ወዳጅ ነው” ብሏል በመግለጫው። 

Via Ethiopian News Agency

ወቅታዊ መረጃዎችን ቀጥታ በኢሜልዎ ለማግኘት ይመዝገቡ

    ያቀረቡትን የግል መረጃ በግላዊ መመሪያችን መሠረት እንጠብቃለን::