“Ilia Volkova የምትባል/የሚባል ሰራተኛ የለኝም”— የሩሲያ አለም አቀፍ ጉዳዮች ምክር ቤት ለኢትዮጵያ ቼክ

ይህ ከቀናት በፊት ‘Ilia Volkova’ በሚል ስያሜ የተከፈተ የትዊተር አካውንት ሲሆን የአካውንቱ ባለቤት በሩሲያ አለም አቀፍ ጉዳዮች ምክር ቤት (Russia International Affairs Council) የወታደራዊና ፖለቲካ ጉዳዮች ባለሙያ እንደሆነች ትገልፃለች።

አካውንቱ እጅግ በርካታ ኢትዮጵያን የተመለከቱ ፅሁፎች በተደጋጋሚ እየተላለፉበት ሲሆን በመቶዎች፣ አንዳንድ ግዜ ደግሞ በሺዎች የሚቆጠሩ ሰዎች ላይክ ያረጉታል፣ ያጋሩታል እንዲሁም አስተያየት ይሰጡበታል። የመልዕክቶቹ የስክሪን ቅጅዎችም በፌስቡክ ገጾች ላይ ሲዘዋወሩ ኢትዮጵያ ቼክ አስተውሏል።

የትዊተር አካውንቱን በተመለከተ ጥያቄ ያቀረብንለት የሩሲያ አለም አቀፍ ጉዳዮች ምክር ቤት ‘Ilia Volkova’ የሚባል ሰራተኛ እንደሌለው ለኢትዮጵያ ቼክ አሳውቋል።

ከቅርብ ጊዜ ወዲህ በተለይ የውጭ ሀገር ሰዎችን ስምና የፊት ገጽታ የሚጠቀሙ ሀሰተኛ የትዊተር አካውንቶች መበራከታቸው የተስተዋለ ሲሆን ኢትዮጵያ ቼክ የተወሰኑትን ማጋለጡ ይታወቃል።

ተመሳስለው የተከፈቱ ሀሰተኛ ገጾችን እና አካውንቶችን ባለመከተል ከሀሰተኛና ከተዛቡ መረጃዎችን ስርጭት እራስዎን ይጠብቁ።

Note: አካውንቱ ከሰዐታት በፊት የሩሲያ አለም አቀፍ ጉዳዮች ምክር ቤት ሰራተኛ መሆኑን የሚገልጽውን ጽሁፍ ከፕሮፋይሉ ላይ ሰርዟል።

ወቅታዊ መረጃዎችን ቀጥታ በኢሜልዎ ለማግኘት ይመዝገቡ

    ያቀረቡትን የግል መረጃ በግላዊ መመሪያችን መሠረት እንጠብቃለን::